ខេត្តកំពង់ឆ្នាំង ជាខេត្តមួយស្ថិតនៅប៉ែកខាងលិចឈៀងខាងជើងនៃផ្ទៃប្រទេស ក្នុងចំណោមរាជធានី ខេត្តទាំង ២៥ នៃព្រះរាជាណាចក្រកម្ពុជា តាមបណ្តោយផ្លូវជាតិលេខ៥ បានប្រវែង ៩១ គ.ម (ភ្នំពេញ-កំពង់ឆ្នាំង ៩១ គ.ម)ផ្លូវទឹកមានប្រវែង ១០០ គ.ម(ភ្នំពេញ-កំពង់ឆ្នាំង ១០០ គ.ម) ផ្លូវដែកមានប្រវែង ៧៣ គ.ម មានព្រលានយន្តហោះដែលជាសក្តានុពលដល់ការរៀបចំផ្លូវអាកាស ។ ខេត្តកំពង់ឆ្នាំង មានព្រំប្រទល់ ៖ ខាងកើតជាប់ខេត្តកំពង់ចាមខាងត្បូងជាប់ខេត្តកំពង់ស្ពឺ និងខេត្តកណ្តាល ខាងលិចជាប់ខេត្តពោធិ៍សាត់ និងខាងជើងជាប់ខេត្តកំពង់ធំ នមានក្រុង ១ ស្រុកចំនួន ៧ សង្កាត់ចំនួន ៤ ឃុំចំនួន ៦៦ និងភូមិចំនួន ៥៦៩ភូមិ ។

          ផ្ទៃដីសរុប ៥៥២.១០០ហិកតា ក្នុងនោះផ្ទៃដីដាំដុះមានចំនួន ១៨០.៩២៦ ហិកតា (ស្រែលើ ស្រែឡើងទឹក ស្រែប្រាំង ចម្ការ) ហើយមានប្រជាជនសរុប ៥២៩.៨៩០ នាក់ ដែលប្រជាជនចំនួន ៧៩.៣% នៃប្រជាជនសរុប ប្រកបមុខរបរកសិកម្មជាចំបង(មុខរបរផលិតកម្មដាំដុះ ចិញ្ចឹមសត្វ និងសិបកម្មកសិកម្ម) ។

          សណ្ឋានដីចែកចេញជា​ ៣ តំបន់៖(១)តំបន់វាលទំនាប:​ជាដំបន់លិចទឹកនៅរដូវវស្សាដែលជាប្រភេទដីល្បាប់នៅតាមដងទន្លេសាបសម្បូរទៅដោយជីវជាតិដែលជាកក្តាអំណោយផលយ៉ាងល្អ មានសក្តានុពល លើការដាំដុះដំណាំបន្លែ ចំការ ស្រូវប្រាំង...និងផលនេសាទ ដែលតំបន់នេះមាននៅជាប់ព្រំប្រទល់ជាប់កំពង់ធំ និងខេត្តកំពង់ចាម ។

(២)តំបន់វាលរាប: មានដង់ស៊ីតេប្រជាជនខ្ពស់ជាងគេ ប្រជាជនភាគច្រើនបានទទួលនូវសេវាសាធារណៈខ្ពស់ជាតំបន់នានា មានសក្តានុពលសេដ្ឋកិច្ចលើការដាំដុះស្រូវវស្សា ស្រោចស្រពដោយទឹកភ្លៀង និងប្រព័ន្ធធារាសាស្រ្ត និងសកម្មភាពរដ្ឋបាល សេដ្ឋកិច្ច សង្គមកិច្ចយ៉ាងសកម្ម ។តំបន់នេះមានទីតាំងនៅផ្នែកកណ្តាលចន្លោះផ្លូវដែក និងផ្លូវជាតិលេខ ៥។

(៣)តំបន់ព្រៃភ្នំ :ស្ថិតនៅខាងលិចផ្លូវដែកប៉ែកខាងលើជាប់ខេត្តកំពង់ស្ពឺ និង ពោធិ៍សាត់ មានសក្តានុពលលើការដាំដុះស្រូវ អនុផលព្រៃឈើនិងសត្វព្រៃ ។ស្រុក ២ គឺ ស្រុកកំពង់លែង និងស្រុកជលគិរី ដែលស្ថិតនៅតំបន់វាលទំនាបរួមមាន ១៤ឃុំ ស្ថិតនៅទិសខាងជើងភាគខាងកើតនៃទីរួមខេត្ត ។ឃុំភាគច្រើននៃខេត្ត ស្ថិតនៅតាមបណ្តោយផ្លូវជាតិលេខ៥ ដែលមានការងាយស្រួលក្នុងការទទួលនូវសេវាសាធារណៈ សកម្មភាពទីផ្សារ និង​សកម្មភាពសេដ្ឋកិច្ចសង្គមកិច្ច ។

         ការអភិវឌ្ឍន៍វិស័យកសិកម្ម គឺជាគន្លឹះអាទិភាពចំបងមួយដែលជម្រុញសេដ្ឋកិច្ចជាតិ ឆ្ពោះទៅរកភាពរីកចម្រើននិងស្ថានភាពគ្រប់គ្រាន់លើផលិតកម្មកសិកម្ម ឈានទៅលើកស្ទួយកម្រិតជីវភាពរស់នៅរបស់ប្រជាជន ។ដំណើរការនៃការអភិវឌ្ឍន៍វិស័យកសិកម្ម គឺមិនត្រឹមតែលើកស្ទួយការអភិវឌ្ឍន៍ក្នុងវិស័យដើម្បីជម្រុញការបង្កើនស្បៀងអាហារ និងជីវភាពប្រជាជនប៉ុណ្ណោះទេ គឺថែមទាំងផ្តោតការយកចិត្តទុកដាក់ផងដែរទៅលើការគ្រប់គ្រង និងអភិរក្សធនធានធម្មជាតិដែលអាចផ្តល់នូវអត្ថប្រយោជន៍ យ៉ាងច្រើនដល់សង្គមប្រកបដោយនិរន្តភាព និងកំណើនសេដ្ឋកិច្ចជាតិ ។

          បច្ចុប្បន្នផលិតកម្មកសិកម្មប្រទេសកម្ពុជាយើង ក៏ដូចជានៅក្នុងខេត្ត នៅមានកម្រិតនៅឡើយដែលជាហេតុធ្វើឲ្យការផលិតទទួលបានទិន្នផលទាប និងបរិមាណផលិតផលមិនទាន់ឆ្លើយតបតាមតម្រូវការទីផ្សារ ។ម្យាងវិញទៀតអាស្រ័យដោយកំណើនប្រជាជនរបស់យើងមានការកើនឡើងយ៉ាងឆាប់រហ័ស ដែលជាហេតុធ្វើឲ្យការផ្គត់ផ្គង់ មិនឆ្លើយតបទៅតាមតម្រូបការ ។

តួនាទីនិងភារកិច្ចមន្ទីរកសិកម្ម រុក្ខាប្រមាញ់ និងនេសាទ

    មន្ទីរកសិកម្មរាជធានី ខេត្ត ជាអង្គភាពថ្នាក់មូលដ្ឋានរបស់ក្រសួងកសិកម្ម រុក្ខាប្រមាញ់ និងនេសាទ មាន        បេសកកម្មដឹកនាំ គ្រប់គ្រង និងធ្វើសកម្មភាពវិស័យកសិកម្មនៅក្នុងក្របខ័ណ្ឌរដ្ឋបាលរាជធានី ខេត្ត របស់ខ្លួន

1. មន្ទីរកសិកម្មខេត្តមានមុខងារនិងភារកិច្ចដូចតទៅ ៖

• លើកផែនការដឹកនាំនិងជំរុញការអនុវត្តកិច្ចអភិវឌ្ឍវិស័យកសិកម្មនៅក្នុងរាជធានី ខេត្ត ស្របតាមគោលនយោបាយរបស់ក្រសួងកសិកម្ម  រុក្ខាប្រមាញ់ និងនេសាទ ។
• គ្រប់គ្រងទិន្ន័យកសិកម្មគ្រប់ជំនាញ លើកគម្រោងផែនការនិងវិធានការអភិវឌ្ឍវិស័យកសិកម្ម
• លើកគម្រោងកម្មវិធីចំណូល ចំណាយ តាមដានពីការអនុវត្តនិងប្រមូលចំណូលក្នុងវិស័យកសិកម្មបង់ចូលថវិករដ្ឋ
• គ្រប់គ្រងមន្ត្រីរាជការ ថវិកា ទ្រព្យសម្បត្តិរដ្ឋរបស់មន្ទីរកសិកម្ម ខេត្ត ឲ្យបានត្រឹមត្រូវតាមគោលការណ៍ច្បាប់
• រៀបចំកម្មវិធីបណ្តុះបណ្តាលនិងបំពាក់បំប៉ន ពង្រឹងសម្ថភាពមន្ត្រីបុគ្គលិក
• ផ្សព្វផ្សាយ ជម្រុញ ណែនាំ និងត្រួតពិនិត្យ អនុវត្តបណ្តាវិធានការបច្ចេកទេសក្នងវិស័យកសិកម្មគ្រប់ផ្នែកដល់ការិយាល័យអង្គភាពចំណុះ បណ្តាការិយាល័យកសិកម្មក្រុង ស្រុក ខណ្ឌ និងមណ្ឌលកសិកម្មឃុំ សង្កាត់
• ផ្តល់ការគាំទ្រនិងផ្ទេរបច្ចេកទេសក្នុងវិស័យកសិកម្មគ្រប់ផ្នែក ដល់កសិករនិងដៃគូចូលរួម និងលើកទឹកចិត្តអង្គការវិជ្ជាជីវៈសមាគមនានានិងបង្កើតសហគមន៍អភិវឌ្ឍនានាដែលពាក់ព័ន្ធនឹងវិស័យកសិកម្មដើម្បីកែលម្អផលិតកម្មនិងផលិតភាពក្នុងវិស័យកសិកម្មគ្រប់ផ្នែក
• ចូលរួម សហការក្នុងការអនុវត្ត វិធានការពារ ធនធានធម្មជាតិក្នុងវិស័យកសិកម្មគ្រប់ផ្នែក តាមការកំណត់នយោបាយអភិវឌ្ឍ អភិរក្សរបស់ក្រសួង
• ចាត់ចែងការងារអន្តរាគមន៍ ទប់ស្កាត់​បង្ការ និង​រាយការណ៍សុំយោបល់ជាបន្ទាន់ពីរដ្ឋបាលរាជធានី ខេត្ត និងក្រសួងនូវបណ្តាសមាសភាព ភយន្តរាយ​ គ្រោះធម្មជាតិ ភាពអនាធិបតេយ្យលើវិស័យកសិកម្មគ្រប់ផ្នែកដែលកើតមាន
• ធ្វើជាដៃគូដ៏ល្អនិងមានប្រសិទ្ធភាពក្នុងកិច្ចសហការ និងកិច្ចសហប្រតិបត្តការជាមួយបណ្តាមន្ទីរនានា

អង្គការ និងម្ចាស់ជំនួយនានា សម្រាប់ការអភិវឌ្ឍវិស័យកសិកម្មនៅក្នុងខេត្ត រាជធានី

• ទទួលអនុវត្តភារកិច្ចផ្សេងៗទៀតដែលថ្នាក់ដឹកនាំក្រសួងប្រគល់ឲ្យ ។

1. មន្ទីរកសិកម្មរាជធានី ខេត្ត ដឹកនាំដោយប្រធានមួយរូបនិងអមដោយអនុប្រធានមួយចំនួន ជាជំនួយការតាមការចាំបាច់:

ក. ប្រធានមន្ទីរ:

• ទទួលខុសត្រូវដំណើរការគ្រប់សកម្មភាពការងារអង្គភាពរបស់ខ្លួនត្រូវទទួលខុសត្រូវចំពោះមុខរដ្ឋមន្ត្រីកសួងកសិកម្ម រុក្ខាម្រមាញ់ និងនេសាទ និងរដ្ឋបាលរាជធានី ខេត្ត នូវរាល់ការងារវិស័យកសិកម្មតាមដានកិច្ចអនុវត្តន៍បទបញ្ជានិងការណែនាំរបស់ថ្នាក់លើក្នុងក្របខ័ណ្ឌច្បាប់និងត្រូវទទួលវិន័យចំពោះអំពើអសកម្មរបស់ខ្លួន ។

                         ខ.អនុប្រធានមន្ទីរ :

• ជួយការងារប្រធានមន្ទីរតាមការប្រគល់ភារកិច្ចពីប្រធានមន្ទីរ
• ទទួលខុសត្រូវចំពោះមុខប្រធានមន្ទីរ លើការងារដែលបានបែងចែកនិងប្រគល់ឲ្យ និងមានភារកិច្ចចូលរួមទទួលខុសត្រូវជាមួយ

ប្រធានក្នុងការដឹកនាំវិស័យកសិកម្មក្នុងរាជធានី ខេត្ត ។

1. មន្ទីរកសិកម្មរាជធានី ខេត្ត មានរចនាសម្ព័ន្ធដូចតទៅ៖

ក. ការិយាល័យចំណុះមន្ទីរៈ

១.ការិយាល័យរដ្ឋបាល បុគ្គលិក

២.ការិល័យផែនការ គណនេយ្យ

៣.ការិយាល័យនីតិកម្មកកសិកម្ម

៤.ការិយាល័យផលិតកម្មនិងបសុព្យាបាល

៥.ការិយាល័យក្សេត្រសាស្ត្រនិងផលិតភាពកសិកម្ម

៦.ការិយាល័យផ្សព្វផ្សាយកសិកម្ម

៧.ការិយាល័យគ្រឿងយន្តកសិកម្ម

៨.ការិយាល័យអភិវឌ្ឍន៍សហគមន៍កសិកម្ម

៩.ការិយាល័យកសិឧស្សាហកម្ម

១០.ការិយាល័យកៅស៊ូ ។

ខ.ក្រៅពីការិយាល័យដូចមានក្នុងចំណុច (ក) ខាងលើនេះ មន្ទីរកសិកម្មរាជធានី ខេត្ត អាចមានអង្គភាពចំណុះតាមការចាំបាច់និងតាមការជាក់ស្តែងរបស់មូលដ្ឋាន ដែលត្រូវសម្រេចបង្កើតដោយប្រកាសរបស់ក្រសួង ។

គ.ការិយាល័យកសិកម្មក្រុង ស្រុក ខណ្ឌ ។

1. ការិយាល័យនិងអង្គភាពនីមួយៗចំណុះឲ្យមន្ទីរ ដឹកនាំដោយប្រធានមួយរូបនិងអមដោយអនុប្រធានមួយចំនួនជាជំនួយការតាមការចាំបាច់ ។
2. ការិយាល័យនីមួយៗ ត្រូវចែកចញជាផ្នែកផ្សេងៗ។ការបង្កើតផ្នែចំណុះការិយាល័យ និងអង្គភាពចំណុះមន្ទីរនិងភារកិច្ចរបស់ផ្នែកនីមួយៗ​ ត្រូវកំណត់សម្រេចដោយប្រធានមន្ទីរកសិកម្មរាជធានីខេត្ត ។
3. ក្នុងករណីចាំបាច់ មន្ទីរកសិកម្មរាជធានី ខេត្ត អាចបង្កើតនិងកំណត់តួនាទីមណ្ឌលកសិកម្មឃុំ សង្កាត់ ការបង្កើតមណ្ឌលកសិកម្មឃុំ សង្កាត់ ត្រូវកំណត់សេចក្តីសម្រេចរបស់ប្រធានមន្ទីរកសិកម្មរាជធានីខេត្ត ។

រចនាសម្ត័ន្ធគ្រប់គ្រងរបស់មន្ទីរកសិកម្ម រុក្ខាប្រមាញ់ និងនេសាទខេត្តកំពង់ឆ្នាំង ព្រមទាំងលេខទំនាក់ទំនង