នៅថ្ងៃចន្ទ ៤រោច ខែផល្គុន ឆ្នាំរោង ឆស័ក ព.ស. ២៥៦៨ ត្រូវនឹងថ្ងៃទី១៧ ខែមីនា ឆ្នាំ២០២៥ លោក ជុំ ម៉ៅច័ន្ទដារ៉ា មន្រ្តីការិយាល័យក្សេត្រសាស្រ្ត និងផលិតភាពកសិកម្ម នៃមន្ទីរកសិកម្ម រុក្ខាប្រមាញ់ និងនេសាទខេត្តកំពង់ឆ្នាំង បានចុះសម្របសម្រួលកិច្ចប្រជុំសន្ទនាក្នុងការតភ្ជាប់ទីផ្សាររវាងអ្នកផ្គត់ផ្គង់ និងកសិករ ក្នុងការអនុវត្តកម្មវិធីផ្តល់អាហារតាមសាលារៀន នៅសាលាបឋមសិក្សាស្មែត ឃុំភ្នំក្រាំងដីមាស ស្រុករលាប្អៀរ ខេត្តកំពង់ឆ្នាំង ដោយមានចូលរួមពីក្រុមការងារនាយកដ្ឋានផែនការស្ថិតិ ការិយាល័យកសិកម្ម ធនធានធម្មជាតិ និងបរិស្ថានស្រុករលាប្អៀរ មន្ត្រីកសិកម្មឃុំ និងគណៈកម្មការជ្រើសរើសអ្នកផ្គត់ផ្គង់ថ្នាក់ឃុំ អ្នកផ្គត់ផ្គង់ និងកសិករ សរុបចំនួន២៧នាក់ ស្រី១២នាក់ ដែលគាំទ្រដោយកម្មវិធីស្បៀងអាហារពិភពលោក(WFP) ហើយជាលទ្ធផល ពួកគាត់បានព្រមព្រៀងគ្នាចុះកិច្ចសន្យាទិញលក់លើផលិតកម្មដំណាំបន្លែ បានចំនួន៧កិច្ចសន្យា ជាមួយកសិករដាំបន្លែចំនួន៧គ្រួសារ។ ក្រុមការងារក៏បានណែនាំដល់មន្ត្រីកសិកម្មស្រុក និងឃុំ ធ្វើការសម្របសម្រួលបន្តទៀត តាមឃុំគោលដៅរបស់សាលារៀន។